बाजुरा ः लैङ्गिक हिंसा र लागू औषध नियन्त्रण सम्बन्धी सचेतनामूलक कार्यक्रम सदरमुकाम मार्तडीमा सम्पन्न भएको छ । जिल्ला प्रशासन कार्यालय बाजुराको आयोजनामा कार्यक्रमको आयोजना गरिएको हो ।

जिल्लाका सरकारी तथा गैरसरकारी कार्यालयका प्रमुख, स्थानीय तहका जनप्रतिनिधी, विद्यार्थी र पत्रकारहरुसंग लैङ्गिक हिंसा र लागू औषध नियमन सम्बन्धी सचेतना  कार्यक्रमको आयोजना गरिएको प्रमुख जिल्ला अधिकारी मेघनाथ पाध्याले बताएका छन् ।

जिल्लामा हुने घरेलु हिंसा  र युवायुवतीहरु लागू औषध दुर्व्यसनी न्युनिकरणमा आवश्यक परामर्श र कानूनी प्रावधानका विषयमा सहजीकरण गरिएको थियो । जिल्लामा घरेलु हिंसाको अवस्था तथा लागू औषध ओसार पसारका कारण अधिकांश युवाहरु कुलतमा फसेको कुरालाई ध्यान दिने गरी सचेतना कार्यक्रमको आयोजना गरिएको हो ।

 जिल्लामा पछिल्लो समय महिला माथि हुने हिंसा बढ्दो र लागू औषधको प्रयोग पनि बढ्दै गएकाले यो कार्यमा न्युनिकरणमा स्थानीय तहले विशेष ध्यान दिन जरुरी रहेका कार्यक्रममा सुझाब दिइएको छ । प्रमुख जिल्ला अधिकारी मेघनाथ पाध्याले कार्यक्रमको सहजीकरण गरेका थिए ।

यस्तै कार्यक्रममा जिल्ला प्रहरी कार्यालय बाजुराले महिला माथि हुने हिंसाका घटनाको कानूनी उपचार र कानूनले तोक्ने सजायका विषयमा प्रहरी निरीक्षक जनक बोहराले सहजीकरण गरेका थिए ।

प्रमुख जिल्ला अधिकारी मेघनाथ पाध्याको अध्यक्षतामा सञ्चालित कार्यक्रममा जिल्ला समन्वय समिति प्रमुख तुलसीराम रोकाया प्रमुख अतिथि रहेका थिए ।

कार्यक्रममा बडीमालिका नगरपालिकाका नगर उपप्रमुख नन्दा कुमारी थापा, जनप्रतिनिधी, सरकारी तथा गैरसरकारी कार्यालयका प्रमुख तथा प्रतिनिधी, सुरक्षाकर्मी, पत्रकार, विद्यार्थी लगायत सहभागी थिए ।

जिल्ला प्रशासन कार्यालय बाजुराका कम्प्युटर अप्रेटर नयन रावलले सञ्चालन गरेको कार्यक्रम बडीमालिका नगरपालिकाको सभाहलमा सञ्चालन गरिएको हो ।