बाजुरा ः विसु पर्व नजिकिएसँगै बाजुरा सहित सुदूरपश्चिममा चहलपहल बढेको छ । घर लिपपोतदेखि रोजगारी, शिक्षा लगायतका प्रयोजनका लागि जिल्ला बाहिर रहेकाहरु घर फर्केने क्रम बढेसँगै चहलपहल बढेको हो ।  विसु पर्व सुदूरपश्चिमेलीले धुमधामसँग मनाउँछन् ।

विसु पर्व आउनुपूर्व नै सुदूर पहाडका घर रातो माटो र कमेरो माटोले रंगीन हुन् थालेका छन् । नयाँ वर्ष आउनु भन्दा पहिले नै घर लिपपोत गरेमा वर्षभरी नै सुख, शान्ति र समृद्धि कायम हुन्छ भन्ने जनविश्वास रहेको पण्डित गोविन्द जोशी बताउँछन् ।

चैत सुरु भएदेखि नै घर लिप्ने र पोत्ने काम सुरु हुन्छ भने यो काम चैत महिनामा नै सक्नुपर्छ । बुढीगंगा नगरपालिका-३ का अस्मिता थापाले लगभग तीन घण्टा हिँडेर कमेरो र रातोमाटो ल्याएर घर लिपेको सुनाइन् ।

पछिल्लो समयमा घर निर्माणमा सिमेन्टको प्रयोग बढ्न थालेपछि कमेरो र रातोमाटोको प्रयोग पनि घट्दै गएको उनको भनाई रहेको छ । चैत सुरु भएपछि घर लिपपोत गर्नका लागि धेरै टाढासम्म कमेरो र रातोमाटो लिन जाने गरेको गौमुल गाउँपालिका–६ शान्तिटोलका कुशुम चदाँराले बताइन् ।

“बरु बडादसैंका बेलामा खासै लिपपोत गर्दैनौँ, तर चैतमा त जसरी नी लिप्नुपर्छ । कमेरोले घरको माथिल्लो भाग र रातोमाटोले घरको तल्लो भागमा लिप्ने पोत्ने चलन छ” चदाँराले सुनाइन्, “अब यो चलन कम होला जस्तो छ, धेरैजसोले पुराना घरमा लगाएको माटो उप्काएर सिमेन्ट लगाएका छन् ।”

नयाँ वर्ष तथा विसु पर्वमा भारत गएकाहरु घर फर्किन चलन छ । सोही टोलका स्थानीय मनबहादुर चदाँरा पनि विसु मनाउन गाउँ फर्केका छन् । उनी भारतमा रोजगारीको लागि गएका थिए । उनीहरुको आगमनले गाउँमा चहलपहल पनि बढेको छ ।

विसु पर्वको अवसरमा बिहे गरेर गएका छोरी चेली समेत माइत आउने चलन पनि छ । विसु तिहारकै दिन कुल देवताको पूजा गरी ‘गतानी डुब्का’ (स्थानीय खानाको परिकार) खाने चलन छ ।

विसु पर्वका अवसरमा सुदूरपश्चिमका बाजुरा, डोटी, दार्चुला, अछाम, डडेलधुरा, बझाङ, बैतडी, कैलाली र कञ्चनपुर जिल्लामा बसोबास गर्दै आएका पहाडी समुदायले सिस्नु लगाउने प्रचलन पनि रहेको छ ।