बाजुरा : बाजुरा जिल्ला अस्पताल हरियाली बनाउन लागिएको छ । अस्पताल प्रशासनकै सक्रियतामा ‘ग्रीन गार्डेन’ का रुपमा विकास गर्न वृक्षरोपण अभियान थालिएको हो । अस्पताल परिसरलाई स्वच्छ, शान्त र हरित बनाउन बिरुवा वृक्षारोपण गरिएको छ । 

अस्पताल परिसरको हालको अवस्थालाई थप मनोमोहक र हरियाली बनाउन वृक्षारोपण गरिएको कार्यालय प्रमुख डाक्टर चन्द्रशेखर यादवले जानकारी दिए । अस्पताललाई ग्रीन गार्डेन बनाउने उदेश्यका साथ अस्पताल परिसर भित्र बिरुवा बृक्षरोपण कार्यलाई निरन्तरता दिईदै आएको यादवको भनाई छ । 

सहयोगी निकाय र व्यक्तिबाट प्राप्त बोटविरुवाहरु लगाएका छन् । जिल्ला अस्पतालबाट प्रदान गरिने सेवा चुस्तदुरुस्त हुनुका साथै अस्पतालको सौन्दर्यतालाई पनि हेर्न लायक बनाउन पछिल्लो समय वृक्षरोपण कार्य भईरहेको डाक्टर यादवको भनाइ छ । 

वृक्षरोपण कार्यले यहाँको सौन्दर्यतामा पनि निखारता आउनुका साथै अस्पतालमा आउने बिरामीहरुलाई पनि हरियाली ठाउँमा बस्न आनन्दित हुने हुँदा बिरुवा वृक्षरोपण कार्य प्रभावकारी बन्ने विश्वास अस्पताल प्रशासनको छ । 

अहिले अस्पताल बाजुराको परिसर भित्र करिब ४ सय बढी विभिन्न किसिमका बिरुवाहरु रोपिएका छन् । बिरुवाको गोडमेल तथा नयाँ बिरुवा रोप्ने कार्य निरन्तर भईरहेको अस्पताल बाजुरा प्रमुखले बताए ।