बाजुरा ः डिभिजन वन कार्यालय बाजुराको कुल दरबन्दी संङ्ख्या ४४ जनाको रहेको छ । सुदूरपश्चिम प्रदेश सरकारले आवश्यकता अनुसार कर्मचारी व्यवस्थापन गर्न नसक्र्दा सिंगो कार्यालयको कामकाज एक जना अधिकृतको भरमा चलेको छ ।

डिभिजन वन कार्यालयमा ८ जना वन अधिकृतको दरबन्दी रहेको भएपनि हाल एक जना वन अधिकृत शुभाष चन्द्र अयडीको भरमा सिंगो कार्यालयको कामकाज टाउँकोमा छ ।

हाल डिभिजन वन कार्यालयमा ३१ जना स्थायी तथा अस्थायी ज्यालादारी कर्मचारी रहेको डिभिजन वन कार्यालयका प्रमुख सुरेशचन्द्र डिसीले बताएका छन् ।

उनले भने, ‘एकजना कर्मचारीको भरमा सिंगो कार्यालय सञ्चालनमा रहेको छ । प्रदेश सरकारले आवश्यकता अनुसार कर्मचारी व्यवस्थापन गर्न नसक्दा यस्तो भएको बताए ।

जनतालाई आवश्यकता अनुसार सेवा दिन नसक्दा शुभाष एक्लैको भरमा कार्यालय समयदेखि राति अबेरसम्म कार्यालयमै बसेर कामकाज गर्नुपर्ने बाध्यता रहेको छ ।

‘कर्मचारी पर्याप्त नहुँदा प्रभावकारी रुपमा सेवा दिन सकिरहेका छैनौँ’, उनले भने, ‘जसका कारण सेवाग्राही गुनासो गर्छन् ।’ तर काम गरेरै सेवाग्राही पठाउने गरिएको छ ।

कतिपय कर्मचारी दुर्गम जिल्ला भएका कारण आउन मान्दैनन्, प्रदेश सरकारले समेत कर्मचारी पदपूर्ति नगर्दा एक्लैको भरमा सबै काम फत्ते गर्नुपर्ने बाध्यता डिभिजन वन कार्यालयलाई छ ।

एक्लै वन अधिकृत अयडीले ६ वटा सव–डिभिजन वन कार्यालयको जिम्मेवारी लिएर कामकाज गर्नुपर्ने बाध्यता छ । तर त्यो काम जिम्मेवारी बाहिरको गर्नुपरेको छ ।

एउटा सरकारी कार्यालयमा आवश्यकता अनुसार दरबन्दी नहुदाँ सिंगो कार्यालयको जिम्मेवारी एक्लैको भरमा हुनु विडम्बना हो । यसमा प्रदेश सरकारले कर्मचारी पठाएर जनतालाई सहज रुपमा सेवा प्रदान गर्नुपर्छ ।