ताप्लेजुङ ः ताप्लेजुङको फुङ्लिङ नगरपालिका– ११ मा रहेको पाथीभरा क्षेत्रमा केबलकार निर्माणको विरोधमा उत्रिएको ‘नो केबलकार समूह’ र प्रहरीबीच भएको झडपमा घाइते भएका सगुन लावतीलाई उपचारका लागि काठमाडौं पठाइने भएको छ ।

नेपाली सेनाको हेलिकप्टरमार्फत उनलाई काठमाडौं पठाउन लागिएको मोरङका प्रमुख जिल्ला अधिकारी इन्द्रदेव यादवले बताए । उनको फोक्सोमा रगत जमेको चिकित्सकले जनाएका छन् ।

उनीसहित यमबहादुर लिम्बू, धर्मन पालुङ्वाको नोवेल मेडिकल कलेज विराटगरमा उपचार भइरहेको छ । यमबहादुर पहिचानकै आन्दोलनमा शहीद भएका लाजेहाङ लिम्बूका भाइ हुन् ।

उनीहरूको हात र खुट्टामा गोली लागेको आन्दोलनकारीहरूले बताएका छन् । ताप्लेजुङका प्रमुख जिल्ला अधिकारी नेत्रप्रसाद शर्माका अनुसार प्रहरी इन्स्पेक्टर रोहित शर्मासहित १२ जना र सशस्त्र प्रहरीका ९ जना तथा नो केबलकार समूहका ४ जना घाइते भएका छन् ।

अधिकांश सामान्य उपचारपछि डिस्चार्ज भएका छन् । इन्स्पेक्टरसहित केहीको उपचार भइरहेको छ । अहिले त्यहाँको सुरक्षा अवस्था कडा पारिएको छ । सुरक्षा सावधानी अपनाएका कारण नै ठूलो क्षति हुन नपाएको प्रशासनको दाबी छ ।  प्रमुख जिल्ला अधिकारी शर्माले आन्दोलनकारी पक्षका प्रदीप मादेनले आफूलाई जिल्ला छाड्न धम्की दिएको बताए ।

‘घटना हुनुभन्दा अगाडि म आफैंलाई फोन गरेर प्रदीप मादेनले तँ जिल्लामा सुरक्षित छैनस् भनेर असाध्यै अश्लील र तल्लो स्तरका शब्द प्रयोग गरी गाली गरेका थिए,’ शर्माले भने, ‘तँ जे सक्छस्, त्यही गर, अब युद्ध घोषणा भयो भनेर धम्की दिएपछि मैले पनि उहाँलाई तपाईं प्रमुख जिल्ला अधिकारीसँग बोल्दै हुनुहुन्छ, याद गर्नुहोस्, र ख्याल पनि गर्नुहोस् ।

प्रमुख जिल्ला अधिकारी असुरक्षित हुने हो भने तपाईं पनि असुरक्षित हुन सक्नुहुन्छ, तपाईंको धम्कीको जवाफ देको हुँ भने ।’ पाथीभराको बलुडाँडा आसपास क्षेत्रमा दुई पक्षबीच झडप भएको थियो ।

 त्यसक्रममा १२ सेल अश्रुग्यास र केही राउन्ड गोली प्रहार गरेको थियो । ताप्लेजुङमा पाथीभरा मन्दिरसम्म जान केबलकार निर्माणका लागि निर्माण कम्पनीले मंगलबारबाट काम शुरू गरेपछि तनावको अवस्था उत्पन्न भएको हो ।