बाजुरा ःमहिलामा हुने पाठेघरको मुखको क्यान्सर विरुद्धको एच.पी.भी. खोप बाजुराका ७ हजार बढी किशोरीलाई लगाईने भएको छ । जिल्लामा रहेका ७ हजार ८ सय ९४ जना किशोरी एकसाथ खोप लगाईने छ । स्वास्थ्य कार्यालय बाजुराले शनिबार एक औपचारिक कार्यक्रमकाबीच एच.पी.भी. खोपका विषयमा सञ्चारकर्मीहरुसंग छलफल कार्यक्रममा जानकारी गरेको छ ।

खोप अभियान यहीँ माघ २२ गतेदेखि २८ गतेसम्म सञ्चालन हुने जिल्ला स्वास्थ्य कार्यालय बाजुराका निमित्त प्रमुख लालबहादुर खड्काले बताएका छन् । साथै ७ हजार ८ सय ६० र विद्यालय जाने र नजाने ३४ किशोरीहरुलाई खोप लगाइने भएको छ । जसमा कक्षा–६ का १ हजार ६ सय ३८, कक्षा ७ देखि १० सम्मका ६ हजार २ सय २२ र विद्यालय नजाने १० वर्ष उमेरका ५ जना तथा ११ देखि १४ बर्षसम्मका २९ जना किशोरीहरुलाई खोप लगाईदैछ ।

त्यस्तै जिल्लाका ९ वटै स्थानीय तहका १ सय १८ विद्यालय तथा ९१ अन्य खोप केन्द्रबाट खोप लगाइने भएको छ भने खोप अभियानमा २ सय १० स्वास्थ्यकर्मी र ४ सय १८ स्वयंमसेवक खटिने भएका छन् । देशभर एच.पी.भी. खोप अभियान यहीँ माघ २२ देखि फागुन ६ गतेसम्म सञ्चालन हुदैँछ ।

यसैबीच खोप अभियान त्रिवेणी, बडीमालिका, गौमुल, बुढीगंगा, बुढीनन्दा, स्वामीकार्तिक र जगन्नाथमा माघ २२ देखि २४ गतेसम्म सञ्चालन हुनेछ भने खप्तड छेडेदहमा माघ २२ देखि २६ गतेसम्म र हिमालीमा माघ २७ देखि २८ गतेसम्म सञ्चालन हुने भएको छ ।

एच.पी.भी. खोप अभियान सम्बन्धी अभिमुखीकरण कार्यक्रममा स्वागत मन्तव्य राख्दै स्वास्थ्य कार्यालय बाजुराका निमित्त प्रमुख लालबहादुर खड्काले एच.पी.भी. खोप अभियान जिल्लामा ९५ प्रतिशत लक्ष्य लिएपनि शतप्रतिशत प्रतिशत नै पुगाउने लक्ष्य रहेको बताएका छन् ।

अभिमुखीकरण कार्यक्रममा युनिसेफका स्वास्थ्य निर्देशनालयकी सीता सुनारले खोपको बारेमा र एच.पी.भी. खोप अभियानमा खोप लगाएपछि देखिने प्रभावका विषयमा जानकाररी गरेकी हुन् ।  (ए.ई.एफ.आई) को कारण र व्यवस्थापनका उपायबारे जिल्ला अस्पतालमा कार्यरत डाक्टर प्रकाश बहादुर बुढाले जानकारी गराएका हुन् ।

कार्यक्रममा बोल्दै त्यस्तै जिल्ला खोप समन्वय समिति प्रमुख तुलसीराम रोकायाले एच.पी.भी.खोप अभियानलाई सफल पार्न आफ्नो बुताले भ्यायसम्म सबैले सहयोग गर्न आग्रह गरेका छन् । प्रमुख जिल्ला अधिकारी मेघनाथ पाध्याले एच.पी.भी. खोप अभियानभर प्रचारप्रसार तथा सूचना प्रवाहमा सञ्चारकर्मीहरुको महत्वपूर्ण भूमिका रहने बताएका छन् ।

त्यस्तै कार्यक्रममा सहभागीहरुले अभियानमा जिल्लाका सम्पूर्ण पालिकामा कम्तिमा ९५ प्रतिशत खोप अभियान पुगाउने लक्ष्य सहित हस्ताक्षर सहित प्रतिबद्धता व्यक्त गरेका छन् ।

जिल्ला स्वास्थ्य कार्यालय बाजुराको सभा हलमा आयोजित कार्यक्रममा जिल्ला स्थित विभिन्न सञ्चार माध्याममा कार्यरत सञ्चारकर्मीहरुको सहभागीता रहेको थियो ।