बाजुरा ः‘सी लिड्स आइकन अवार्ड’ प्रदान गरेकी गौमुल गाउँपालिकाका उपाध्यक्ष सीता थापालाई पालिकाका कर्मचारीहरुले बधाई तथा सम्मान कार्यक्रमको आयोजना गरेका छन् ।

‘कल्प एम्पावर वेमेन नेपाल’ द्वारा गत शुक्रबार आयोजित महिला जनप्रतिनिधिहरूको सम्मानमा उपाध्यक्ष थापा देशभरका महिला जनप्रतिनिधिहरुमा तेस्रो भएकी हुन् ।

आज गाउँपालिकामा कार्यरत कर्मचारीहरुले औपचारिक कार्यक्रमका साथ बधाई तथा सम्मान कार्यक्रमको आयोजना गरेको प्रशासन सहायक गगन धामीले बताएका छन् ।

कर्मचारीहरुले खुसी व्यक्त गर्दै देशभरका २७ जना जनप्रतिनिधिहरु मध्येबाट छनोटमा परेर उत्कृष्ट तेस्रो स्थान प्राप्त गरेको भन्दै बधाई दिएका छन् ।

उपाध्यक्षको उपस्थिति र सक्रियता नै काफी छ । महिला जागे भने समाज परिवर्तन हुन्छ भन्ने प्रमाण स्थापित गरेको प्रति कर्मचारीहरुले धन्यवाद दिएका छन् ।

कार्यक्रममा उपाध्यक्ष थापाले आफुलाई करुणा, माया र स्नेह भावका साथ सबैको सहयोगका कारण स्थान प्राप्त भएको बताएकी छन् ।

सो अवसरमा प्रभावकारी काम गर्ने विभिन्न पालिकाबाट छानिएका २७ जना महिला जनप्रतिनिधिलाई ‘सी लिड्स आइकन’ सम्मान गरिएको थियो ।

त्यस्तै तीन उत्कृष्ट महिला जनप्रतिनिधिलाई ‘सी लिड्स आइकन अवार्ड’ प्रदान गरिएको थियो ।  कार्यक्रममा देशका विभिन्न स्थानीय तहका जनप्रनिधिको उपस्थिति थियो ।

प्रधानमन्त्री केपी शर्मा ओलीले थापालाई सम्मान गरेका हुन् । हाल देशका स्थानीय तहमा ४० प्रतिशत महिला जनप्रतिनिधि रहेका छन् ।