बाजुरा : मोटरसाईकलकाे ठक्करबाट बाजुराका धर्म खत्रीको धनगढीमा मृत्यु भएको छ । बडीमालिका नगरपालिका– ७ घर भई हाल मार्तडी स्वास्थ्य चौकी चुथिमा जनस्वास्थ्य निरिक्षक पदमा कार्यरत रहेका अन्दाजि ३० वर्षका खत्रीलाई धनगढीकाे चटकपुर नजिकै विपरित दिसाबाट आएकाे माेटरसाईलले ठक्कर दिएपछि  मृत्यु भएको हो ।

धनगढीमा आयोजना भएको तालिममा सहभागी हुन आउँदै गर्दा उनी दुर्घटनामा परेका हुन् । बिहीबार साँझ साढे ६ बजे धनगढी उपमहानगरपालिका-३ को लक्ष्मी नर्सरीनजिकै अतरियाबाट धनगढी आउँदै गरेका दुईवटा मोटरसाइल आपसमा ठोक्किएका थिए।

धनगढी-५ का २५ वर्षीय पुरन शाहले चलाएको सुपप्र ०१२प९४१६ नम्बरको मोटरसाइलमा खत्री पछाडि सवार थिए। यो मोटरसाइकललाई डोटीको शिखर नगरपालिका-११ बस्ने २५ वर्षीया शर्मिला थापाले चलाएको सुप्रप ०१००७११प नम्बरको मोटरसाइलले पछाडिबाट ठक्कर दिएको जिल्ला प्रहरी कार्यालय कैलालीले जनाएको छ।

दुर्घटनामा मोटरसाइकल चालक पुरनको पेट र मुखमा चोट लागेको छ। खत्री भने टाउकोमा चोट लागेर गम्भीर घाइते भएका थिए। उनको सेती प्रादेशिक अस्पतालमा उपचार क्रममा साँझ ६ बजेर ५५ मिनेटमा मृत्यु भएको जिल्ला प्रहरी कार्यालय कैलालीका डिएसपी कविन्द्र बोहराले जानकारी दिए।

घटनापछि मोटरसाइकल चालकहरूलाई प्रहरीले नियन्त्रणमा लिएको छ। पाँच दिन अगाडि तालिमकाे सिलसिलामा धनगढीमा गएका खत्री ७ वर्ष अगाडी स्वास्थ्य समूहकाे तर्फबाट सरकारी सेवामा प्रवेश गरेका थिए ।

खत्री आफु कार्यरत रहेकाे वडामा गाउँकाे स्वास्थ्य सुधार गर्ने योजनामा निरन्तर लागिरहेका थिए  । नकाे शव अहिले सेती प्रादेशिक अस्पताल धनगढीमा राखिएको छ । घटनाबारे थप अनुसन्धान भईरहेकाे प्रहरीले बताएको छ । उनकाे अपत्यारिलो मृत्युकाे खबरले बाजुराबासीले ठुलाे क्षति वेहाेर्नु परेकाे छ ।