बाजुरा : २०५३ सालमा स्थापित भएको गिफ्ट नेपाल हाल २८ वर्षको उमेरमा पुगेको छ । जिल्लामा त्यो बेलादेखि हालसम्म सामाजिक क्षेत्रमा अनवरत खटिरहेको छ । गिफ्ट नेपालले मानवीय, आर्थिक तथा भौतिक रुपमा स्वावलम्बी र समृद्ध समाज निर्माण गर्ने परिकल्पनाका साथ हाल जिल्लामा क्रियाशील रहेको छ ।

मानवअधिकार, सुशासन, पार्दर्शीता र जवाफदेहिता कायम गर्दै जिल्लाका समुदायको समग्र विकासमा पहल गरिरहेको गिफट्ले सामाजिक लेखा परीक्षण समेत गरेको छ ।

जिल्लाका विपन्नको सहारा बनेको गिफ्ट नेपालले लक्षित वर्गको सशक्तिकरण मार्फत स्वावलम्बी बनाउने र आफ्नो समुदायको विकासका लागि स्वपरिचालित हुनका लागि पहल गर्ने गरी लक्ष्य राखेको गिफ्ट जिल्लामा सामाजिक रुपमा थुप्रो काम गरेको छ ।

गिफ्ट नेपालले आधारभूत शिक्षा, स्वास्थ्य, कृषि, खानेपानी तथा सरसफाईका क्षेत्रमा समुदाय परिचालन मार्फत अवस्थामा सकारात्मक परिवर्तनका लागि पहल गर्ने, स्थानीय स्तरमा सबै प्रकारका स्रोत र साधनको खोजी गरी वर्तमान आवश्यकता परिपूर्तिका लागि समन्वकारी भूमिका निभाउने गरिरहेको छ ।

त्यस्तै मानव अधिकार, सुशासन, पारदर्शीता र जवाफदेहिता कायम गर्नका लागि सवै सरोकारवाला निकायसँग समन्वय र अन्तरक्रिया मार्फत सहजीकरण गर्ने, महिला, बालबालिका, ज्येष्ठ नागरिकका चुनौतीहरुको अध्ययन अनुसन्धान मार्फत अवस्थाको पहिचान गरी जीविकोपार्जनमा सहयोग गरिरहेको छ ।

जलवायु परिवर्तन, प्रकोप तथा खाद्यसुरक्षा लगायतका क्षेत्रमा सामाजिक परिचालन तथा सहयोग गर्ने, समुदायमा विकास निर्माणका लागि पुल, सडक, बाटोघाटो, भवन, धर्मशाला, पाटीपौवा, धार्मिक स्थल, पर्यटन स्थल, हाटबजार आदि निर्माणका लागि स्थानीय सरकारसँग समन्वय र सहकार्य समेत गर्ने गरेको छ ।

समाजमा रहेका व्यक्तिहरुको आर्थिक चेतना वृद्धि गर्दै स्थानीयस्तरमा ग्रामिण बैंकको अवधारणामा सहजीकरण विगत वर्षबाट गर्दै आएको छ ।आईतबार गरिएको सामाजिक लेखा परीक्षणका सहभागीहरुले जिल्लामा गिफ्ट नेपालले खेलको भूमिकाको प्रशंसा गरेका छन् । समाजमा रहेका गरिब तथा विपन्न नागरिकको सहारा बनेको प्रति धन्यवाद दिएका छन् ।

गिफ्ट नेपालद्धारा सञ्चालित पाँच वटा परियोजनाको वार्षिक समीक्षा तथा सामाजिक परीक्षण कार्यक्रम सम्पन्न भएको छ । विद्यालय दिवा खाजा कार्यक्रमले स्थानीय रैथाने बालीको परिकार खुवाउने व्यवस्थापन सहित जिल्लाका ९ वटै पालिकाका २५० विद्यालयमा कार्यक्रम लागू भएको छ ।

दिवा खाजा कार्यक्रमबाट विद्यालयमा स्थानीय उत्पादनको तरकारी, दाल सहितको परिकारका लागि ४ करोड ६५ लाख प्रत्यक्ष रुपमा कृषकको खातामा गएको गिफ्ट नेपालका प्रबन्धक कृष्ण अधिकारीले कार्यक्रममा जानकारी गरेका हुन् ।

दिवा खाजा कार्यक्रमबाट ३३ हजार सात सय ४९ जना विद्यार्थी प्रत्यक्ष रुपमा लाभान्वित भएका छन् । यस्तै एकिकृत सामुदायिक विकास परियोजनामा कुल बजेटको ३३ लाख २७ हजार ९५२ रुपैया खर्च भएको परियोजना संयोजक नृप थापाले बताएका छन् ।

गिफ्ट नेपालले मर्सीकोर, युएसएड, डब्लुएफपी, एल डब्लु एफ लगायतका अन्तराष्ट्रिय संस्थाहरुको आर्थिक सहयोगमा कार्यक्रम सञ्चालन गरिरहेको छ । गिफ्ट नेपालका सचिव खडक रोकायाको अध्यक्षतामा सञ्चालन भएको कार्यक्रममा जिल्ला समन्वय समिति बाजुराका प्रमुख तुलसीराम रोकाया प्रमुख अतिथि रहेका थिए ।

कार्यक्रममा बुढीगंगा नगरपालिकाका नगर प्रमुख रामबहादुर बानियाँ, उप–प्रमुख माया कुँवर, बडीमालिका नगरपालिकाकी उप–प्रमुख नन्दा कुमारी थापा लगायत विशिष्ट अतिथि रहेका थिए । गिफ्ट नेपालका कोषाध्यक्ष गोरख बोहराले स्वागत मन्तव्य राखेको कार्यक्रमको सञ्चालन पत्रकार लक्ष्मीराज पाध्यायले गरेका थिए ।

समीक्षा कार्यक्रमको सहजीकरण गिफ्ट नेपालका प्रबन्धक कृष्ण बहादुर अधिकारी र परियोजना संयोजक नृप थापाले गरेका हुन् । कार्यक्रम जनप्रतिनिधि, अगुवा कृषक, विद्यालयका प्रधानाध्यापक लगायत सरकारी तथा गैर सरकारी कार्यालयका प्रमुख सहित सरोकारवाला निकायको सहभागीता रहेको थियो ।

“गिफ्ट नेपालको परिकल्पना, समृद्ध समाज निर्माणको अवधारणा” नारा दिएको गिफ्ट नेपालको आ.व.०८०-०८१ को वार्षिक समीक्षा तथा सामाजिक परिक्षण कार्यक्रम बडीमालिका नगरपालिकाको सभा हलमा सञ्चालन गरिएको हो ।