बाजुरा : विद्यालय तहका पाठ्यपुस्तकमा रहेका त्रुटि सच्याउन अनेरास्ववियुले पाठ्यक्रम विकास केन्द्रलाई ध्यानाकर्षण गराएको छ । विकास केन्द्रका महानिर्देशक इमनारायण श्रेष्ठलाई प्रत्यक्ष भेटेर शुक्रबार ध्यानाकर्षण गराएको अनेरास्ववियु काठमाडौं जिल्ला कमिटीका इन्चार्ज धर्मराज तिमिल्सिनाले बताएका छन् ।

विद्यालय तहमा अध्ययनरत ५६ लाख ७६ हजारभन्दा बढी विद्यार्थीलाई पाठ्यपुस्तक मार्फत गलत पुस्तक पढाउन बाध्य बनाएको भन्दै अनेरास्ववियुले गम्भीर हुन आग्रह गरेको हो । अनेरास्ववियु काठमाडौं जिल्ला कमिटीका इन्चार्ज धर्मराज तिमिल्सिनाको नेतृत्वमा गएको टोलीले तत्काल पाठ्यपुस्तकमा रहेका गल्ती सच्याउन ध्यानाकर्षण गराएको छ ।

पाठ्यक्रम विकास केन्द्रले ७७ वटै जिल्लाका ३५ हजार ६ सय ७४ भन्दा बढी विद्यालयमा गलत शिक्षा पढ्न बाध्य पारेर राज्यको लगानीमाथि गम्भीर घात गरेको, अभिभावकका सपना कुल्चिने दुष्प्रयास गरेको र विद्यार्थीको भविष्यसँग खेलबाड गरेको अनेरास्ववियुको भनाई रहेको छ ।

‘यसमा संलग्न जिम्मेवार, विषय समितिहरू, व्यक्तिहरू तथा संयन्त्रहरूको यो गैरजिम्मेवारीपन अक्षम्य रहेको छ, अनेरास्ववियुले बुझाएको ध्यानाकर्षण पत्रमा उल्लेख गरिएको छ । तत्काल पाठ्यपुस्तकमा भए गरिएका कमजोरी सच्याउन र आवश्यक छानबिन गरी २०८२ मा प्रकाशित हुने पाठ्यपुस्तक सच्याएर मात्र प्रकाशित र वितरण गर्न अनेरास्ववियुले आग्रह गरेको समेत छ ।

पाठ्यक्रम विकास केन्द्रको यस प्रकारको लापरबाहीले सरकारी डकुमेन्टप्रतिको विश्वास टुटेको अनेरास्ववियुको निष्कर्ष रहेको छ । २०७८ सालको जनगणनाको अन्तिम नतिजा २०७९ चैत्र १० गते नै राष्ट्रिय तथ्याङ्क कार्यालयले सार्वजनिक गरेकोमा हालसम्म पनि कक्षा १० को पाठ्यपुस्तकमा राष्ट्रिय जनगणना २०६८ कै तथ्याङ्क राखिनु गलत भएको अनेरास्ववियुले जनाएको छ ।

यी लगायत पाठ्यपुस्तक धेरै त्रुटि भएको भन्दै त्यसलाई सच्याउन माग गरिएको छ । ‘गलत पुस्तक पढ्नु पनि विषपान सरह हो’ अनेरास्ववियुले भनेको छ ।  महानिर्देशक श्रेष्ठले पाठ्यपुस्तकका कमजोरी सच्याउने प्रतिक्रिया दिएका छन् । उनले शैक्षिक सत्र २०८२ मा कमजोरी सच्याएर पुस्तक आउने प्रतिवद्धता गरेका छन् ।