बाजुरा : नेकपा (एमाले) जिल्ला कमिटी सचिव तथा दलित अगुवा काँशी विकले समाजमा रहेका पहुँच विहिनका पक्षमा कलम केन्द्रीत गर्न पत्रकारहरुलाई आग्रह गरेका छन् ।

आईतबार राष्ट्रिय दलित पत्रकार संघ जिल्ला कार्य समिति बाजुराको दोस्रो जिल्ला अधिवेशनको सम्बोधन गर्दै विकले यस्तो बताएका हुन् ।

समाज भित्र रहेका सम्भावना र समस्या केन्द्रीत सवाल उठान गरी जनताका आवाज बोलेर समाजको ऐनाको रुपमा भूमिका खेल्नुपर्नेमा जोड दिएका छन् ।

जिल्लाको पत्रकारिता विस्तारै सफलताको बाटोमा हिडेको उल्लेख गर्दै पिँधमा रहेको दलित समुदाय हालसम्म विभेदको सिकार बनिरहेको धारणा राखेका छन् ।

दलित समुदाय कोटाका विषयमा मात्र बोल्छन् भन्ने आरोपलाई अस्वीकार गर्दै जातीय रुपमा अझै पनि समाजले सम्पूर्ण रुपमा स्वीकार गर्न नसकेको उल्लेख गरेका छन् ।

हालको व्यवस्था नेपाली जनताको त्याग र बलिदानबाट आएकोले जनता सशक्त बने मात्र समाज परिवर्तन हुने विश्वास गरेका छन् ।

हरेक किसिमका परिवर्तन व्यवस्थाले ल्याएका कारण नेपाली समाजमा विभेद नभएपनि आचरण, शैली र प्रवृत्तिका कारण हालसम्म दलित समुदाय विभेद सिकार बनिरहेको दोहोर्याएका छन् ।

समाजमा रहेका सामाजिक असमानताको अन्त्य भए मात्र नेपाली समाज परिवर्तन हुने भएका कारण यसमा आफु गम्भीर भएर लाग्ने वचन दिएका छन् ।

फरक प्रसंङ्गमा बोल्दै सचिव विकले पार्टीले समाज रहेका जातीय विभेद लगायत अन्य विभेदको अन्त्यका लागि टोलसम्मै सन्देश प्रवाह गर्ने बताएका छन् ।

कार्यक्रममा राष्ट्रिय दलित पत्रकार संघ केन्द्रीय सदस्य बसन्त विश्वकर्माले समाजमा विभेद अझै कायमै रहेको बताएका छन् । विभेद गर्नेहरुका विरुद्ध राष्ट्रिय दलित पत्रकार संघ बाजुरा गम्भीर भएर लाग्न सुझाव दिएका छन् ।

कार्यक्रममा बोल्ने बक्ताहरुले अब समाजमा रहेका अन्धविश्वास र भ्रष्टाचार केन्द्रीत बनेर कलम चलाउनुपर्नेमा जोड दिएका छन् ।