बाजुरा : शी लिड्स आइकनको विजेतामा दोस्रो नम्बरमा छनोट भएकी गौमुल गाउँपालिकाकी उपाध्यक्ष सीता थापाले आइकनको विजेता बनाउन भोटको अपिल गरेकी छन् । छनोटमा परेका देशभरका २७ जना महिला जनप्रतिनिधिलाई पत्रकार सम्मेलन मार्फत सार्वजनिक गरेसंगै भोट गर्नको लागि खुल्ला गरिएको छ ।

आइकनले महिला जनप्रतिनिधिको काम र योगदानका आधारमा छनोट गर्ने क्रममा गौमुल गाउँपालिकाका उपाध्यक्ष सीता थापा दोस्रो नम्बरमा परेकी हुन् । थापा देशभरबाट २७ र सुदूरपश्चिमबाट ३ जना महिला मध्येबाट उत्कृष्ट दोस्रो नम्बरमा परेकी हुन् ।

भोट गर्नका लागि (अफलाई) अर्थात एसएमएस मार्फत ३१००३ डायल गरेर (अंग्रेजीमा Sli स्पेस ०२) मा एसएमएस पठाएर भोट गर्नुपर्नेछ भने (ई–सेवामा गएर समेत) भोट गर्नका लागि खुल्ला गरिएको छ ।

भोट गरेर विजेता बनेमा “महिला स्वास्थ्य, महिला उद्यमशीलता, नीति र न्याय, सशक्तिकरण र जवाफदेहीता” क्षेत्रमा प्रेरणादायी र उत्कृष्ट कार्य सम्पादनको नेतृत्व गर्ने ३ जना महिला जनप्रतिनिधिलाई सम्मान गर्दै महिला जनप्रतिनिधिको सुकर्मलाई विश्व सामु पुर्याउने उदेश्य आइकनको रहेको छ ।

त्यसमध्ये ३ जनालाई विजेता घोषणा गर्दै ३ जना आइकनको कार्यस्थलमा पुगेर प्राविधिक टोली सहित वृत्तचित्र तयार पारिने भएको छ ।  यसरी तयार पारिएको वृत्तचित्रलाई सामाजिक सञ्जाल, टेलिभिजन र शी लिड्स फेलोको मदतबाट नेपालमा ५० भन्दा बढी स्थानीय तहमा प्रर्दशन गरिने र सो बारे जनमत संकलन गरिने छ ।

साथै विशिष्टिकृत अग्रता को आधारमा शी लिड्स आइकनहरूलाई राष्ट्रिय स्तरको कार्यक्रम आयोजना गरी सम्मान गरिनेछ । महिला जन्मदै विभेदको सिकार हुदैं आधुनिक मानव समाजको मान्यता अनुसार पाउनुपर्ने सामान्य मानवीय अधिकारबाट समेत बञ्चित हुनुपर्ने कहाली लाग्दो दुर्दशाको भुमरीमा नेपाली महिलाहरुको जीवनपथको सुरुवात भएकाे हुन्छ ।

पृतिसत्तात्मक सोचको अदृश्य नेलकडीमा जकडिएर, रूढीवादी साँस्कृतिक मान्यताका विषाक्त काँडाहरुमा टेक्दै अनि हृदयको अन्तर्यमा निहित ममता र करूणालाई आँधी बेहरीमा दियो जोगाए झैं जोगाउदै नेपाली महिलाहरुले बिताउदै आएको जिन्दगी कुनै रण विजयी पात्रको कथा भन्दा कम हुदैन् ।

त्यसमा पनि सामाजिक व्यवस्थालाई नेतृत्व गर्ने राजनीतिक जस्तो बिहंगम् क्षेत्रमा आईपुगेका र राजनीतिक जिम्मेवारीमा रही आफैले नेतृत्वदायी भुमिका निर्वाह गरी रहेका नेपाली महिलाहरुको जीवनगाथा भन्दा प्रेरणादायी कृति संसारमा अर्को हुन् सक्दैन होला ।

आजको विश्व समाजमा, नेपाली महिलाहरुले भोग्दै आएका तमाम विभेदहरु, दमनहरु, अपहेलनाहरु र अमानवीयता समेतलाई सामना गर्दै खास गरी राजनीतिक क्षेत्रमा नेतृत्वदायी भूमिकामा पुग्न नेपाली महिलाहरुले उठाउनुभएको जिम्मेवारीको पर्वत अनि प्रर्दशन गर्नुभएको वीरता र सहासको अदम्यता विश्वभरका महिलाहरुको निम्ति प्रेरणा र उर्जाको विपुल संग्रह बन्न सक्छन् ।