बाजुरा ः यस वर्षको नयाँ शैक्षिक शत्र सुरु भएको छ । वैशाख २ गतेदेखि सुरु भएको विद्यार्थी भर्ना अभियान प्रभावित भएको छ । शिक्षक तथा विद्यालय कर्मचारीहरूको आन्दोलनका कारण देशभर सुरु भएको विद्यार्थी भर्ना अभियान प्रभावित भएको हो । यथाशीघ्र विद्यालय शिक्षा ऐन जारी गर्नुपर्ने मागसहित चैत २० गतेदेखि शिक्षक कर्मचारी काठमाडौँ केन्द्रित सडक आन्दोलनमा छन् ।

काठमाडौँ नगएका शिक्षकहरू समेत विद्यार्थी भर्ना अभियान लगायत कुनै पनि गतिविधिमा संलग्न नहुन चेतावनी दिइरहेका छन् । नेपाल शिक्षक महासंघले विद्यालय खोल्ने र विद्यार्थी भर्ना अभियानमा संलग्न हुने शिक्षक तथा विद्यालय माथि निगरानी राखेको छ । महासंघका अध्यक्ष लक्ष्मीकिशोर सुवेदीले माग पूरा नहुँदासम्म कुनै पनि शैक्षिक गतिविधिमा संलग्न नहुने बताए ।

कतिपय विद्यालयमा शिक्षकहरू भर्ना अभियानमा सक्रिय रहेको जानकारी आएको बताउँदै सुवेदीले उनीहरू माथि सुक्ष्म निगरानी गर्दै आएको बताए । आन्दोलनका लागि काठमाडौँ नगएका शिक्षकहरूले समेत महासंघको चेतावनीपछि विद्यार्थी भर्ना अभियान बहिष्कार गरेका छन् ।

कतिपय विद्यालयले त सार्वजिनक सूचना नै जारी गरेर विद्यार्थी भर्ना अभियान अनिश्चितकालका लागि स्थगित गरेको जनाएका छन् । केही विद्यालयमा विद्यालय व्यवस्थापन समिति र अभिभावकहरूको उपस्थितिमा अभियान सुरु भएको छ ।

गौमुल गाउँपालिका-६ बसालामा रहेको घटाल आधारभुत विद्यालयका प्रधानाध्यापक हर्कबहादुर थापाले एक सूचना जारी गर्दै शिक्षक आन्दोलनमा उठाइएका माग पूरा नहुँदासम्म सम्पूर्ण शैक्षिक क्रियाकलाप स्थगित गरिएको बताएका छन् ।

सरकारले भने शैक्षिक सत्र २०८२ को भर्ना अभियान सञ्चालन गर्न स्थानीय तह र देशभरका विद्यालयलाई परिपत्र गरेको थियो । शिक्षा, विज्ञान तथा प्रविधि मन्त्रालयले संघीय मामिला मन्त्रालय मार्फत भर्ना अभियान सञ्चालन गर्न परिपत्र गरे पनि शिक्षकहरूको आन्दोलनका कारण ती सबै कार्य ठप्प भएका हुन् । महासंघले नयाँ वर्षको दिन समेत सडकमा प्रदर्शन जारी राखेको थियो ।

नयाँ शैक्षिक सत्रको विद्यार्थी भर्ना गर्न देशभरका स्थानीय तह र विद्यालयलाई सरकारले गरेको सर्कुलर बहिष्कार गर्दै शिक्षक महासंघले माग पूरा नभएसम्म आन्दोलनलाई निरन्तरता दिने अडान कायमै राखेको छ । शैक्षिक हडताल सहितको शिक्षक आन्दोलनका कारण विद्यार्थी भर्ना अभियानका साथै एसईईको उत्तरपुस्तिका परीक्षण समेत रोकिएको छ । वैशाख ११ गतेदेखि हुने कक्षा १२ को परीक्षा समेत प्रभावित हुने भएको छ ।

महासंघले विद्यार्थी भर्ना अभियानबाट शिक्षक अलग रहने, कक्षा १२ को परीक्षामा शिक्षक तथा कर्मचारी सहभागी नहुने र एसईईको उत्तरपुस्तिका परीक्षण पनि नगर्ने निर्णय गरेको थियो । ७७ वटै जिल्ला, ७ प्रदेशको आन्दोलन परिचालन समितिको बैठक बसेको थियो । उक्त बैठकले शैक्षिक हडताललाई थप प्रभावकारी र सशक्त बनाउने निर्णय गरेको थियो ।

महासंघले संसद्को वर्षे अधिवेशन तत्काल बोलाएर, विशेष अधिवेशन आह्वान गरेर वा अध्यादेशबाट शिक्षा ऐन ल्याउनुपर्ने तीन वटा विकल्प सरकारलाई दिएको छ । सरकारले शिक्षकका माग सम्बोधनका लागि पहल भइरहेको दाबी गर्दै आएको छ । शिक्षा मन्त्रालयले त झन् वैशाख २ गतेभित्र घर फर्किनेगरी सहमतिको प्रयास भइरहेको दाबी गरेको थियो । यद्यपी अहिलेसम्म सहमति जुट्न सकेको छैन् ।

शिक्षकहरूले आन्दोलन कठोर बनाउँदै लगेका छन् । जिल्लाका सरकारी  विद्यालयका  सम्पूर्ण शिक्षक १४ दिनदेखि काठमाडौंमा छन् । प्रत्येक दिन आन्दोलनमा सहभागी हुन्छन् । ‘माइतघर टु बानेश्वर’ गरिरहेका छन् । ‘विद्यालय बन्द छन, शैक्षिक हड्ताल छ ।’ भर्ना अभियान रोकेर देशभरबाट शिक्षकहरू अझैं काठमाडौं आउने र जाने रोटेसन बनाईरहेका छन् ।

वैशाख १ गते देखी शैक्षिकसत्र २०८२ सुरु भयो । तर शिक्षक महासंघले शिक्षा ऐन जारी नभएसम्म शैक्षिक हड्तालको घोषणा गरेको छ । २० चैतदेखि शिक्षकहरूले काठमाडौंमा आन्दोलन गरिरहेका छन् ।

जसका कारण बाजुरा लगायत देशभरका सामुदायिक विद्यालय ठप्प छन् । यता शिक्षाका जानकारहरुले भने शैक्षिक गुणस्तर सुधारमा समेत शिक्षकहरुले आफ्ना माग राखेर आन्दोलन गरे जस्तै ध्यान दिएमा शैक्षिक गुणस्तर सुधार हुने टिप्पणी गरिरहेका छन् ।